Бүгін, 3 маусымда, Қазақстан Республикасы Парламенті Мәжілісінің жалпы отырысында депутаттар «Қазақстан Республикасының кейбір заңнамалық актілеріне нотариаттық қызмет және заң көмегі мәселелері бойынша өзгерістер мен толықтырулар енгізу туралы» Қазақстан Республикасы Заңының жобасын екінші оқылымда мақұлдады.
Заң жобасы бойынша Қазақстан Республикасы Парламенті Мәжілісінің депутаты Дмитрий Колода баяндама жасап, әріптестерін құжат бірінші оқылымда қабылданғаннан кейін жүргізілген жұмыстардың нәтижелері туралы хабардар етті.
Оның айтуынша, депутаттық түзетулер нотариаттық қызметті реттеуді жетілдіруге, азаматтардың құқықтары мен заңды мүдделерін қорғауды күшейтуге, сондай-ақ нотариаттық рәсімдердің ашықтығын арттыруға бағытталған.
Жекелей алғанда, заң жобасында нотариаттық іс-әрекеттерді одан әрі цифрландыру және Бірыңғай нотариаттық ақпараттық жүйенің жұмысын жетілдіру жөніндегі шаралар көзделген. Сонымен қатар, нотариаттық қызметпен айналысу құқығына арналған лицензияның қолданысын тоқтата тұру және одан айыру үшін негіздер тізбесі кеңейтілуде, оның ішінде дербес деректер туралы заңнаманы бұзғаны және электрондық цифрлық қолтаңбаны үшінші тұлғаларға беру фактілері үшін де жауапкершілік қарастырылған.
Құжатпен жұмыс істеу барысында нотариаттық қоғамдастықтың корпоративтік басқару мәселелеріне ерекше назар аударылды. Депутаттар Республикалық нотариаттық палата төрағасының, аумақтық нотариаттық палаталар төрағаларының, сондай-ақ нотариаттың тәртіптік комиссиялары төрағаларының өкілеттік мерзімдерін шектеуді көздейтін түзетулерді қолдады. Бұл ретте заң жобасында өтпелі ережелер бар, оған сәйкес лауазымда болудың шекті мерзімін есептеу кезінде тиісті шектеулер енгізілгенге дейін өтелген өкілеттік кезеңдері де ескерілетін болады.
Азаматтардың құқықтарын қосымша қорғау және атқарушылық жазбаны жасау рәсімін жетілдіру мақсатында өндіріп алушыны нотариусқа борышкердің міндеттемені орындамау фактісін жазбаша түрде мойындауын ұсынуға міндеттейтін норма қабылданды.
Бұдан бөлек, депутаттар конституциялық іс жүргізу шеңберінде азаматтардың кепілдік берілген мемлекеттік заң көмегін алу тәртібін жетілдіруге бағытталған түзетулерді қолдады. Осыған байланысты заң жобасының атауы да өзгертілді. Енді ол «Қазақстан Республикасының кейбір заңнамалық актілеріне нотариаттық қызмет және заң көмегі мәселелері бойынша өзгерістер мен толықтырулар енгізу туралы» Қазақстан Республикасының Заң жобасы деп аталады.
Отырыс барысында атап өтілгендей, заң жобасымен жұмыс істеу процесінде 100-ден астам түзету келіп түскен. Құжат мемлекеттік органдардың, кәсіби қоғамдастықтың және басқа да мүдделі ұйымдардың өкілдері қатысқан жұмыс тобының отырыстарында жан-жақты қаралып, бейінді комитет пен Парламент Мәжілісінің оң қорытындыларын алды.
Дауыс беру қорытындысы бойынша заң жобасын қатысып отырған 81 депутаттың 80-і қолдады.
Құжатты Қазақстан Республикасы Парламентінің Сенатында қарау заңнамалық рәсімнің келесі кезеңі болмақ.