2026 жылғы 21 мамырда өткен Қазақстан Республикасы Парламенті Мәжілісінің пленарлық отырысынан кейін Мәжіліс депутаты Мұрат Әбенов Республикалық нотариаттық палата төрағасы Олег Полумордвиновты нотариат қызметі мәселелері бойынша заң жобасын талқылауға арналған ашық сараптамалық эфирге шақырды.
Депутаттың айтуынша, кездесудің мақсаты атқарушылық жазба институтына, берешектерді өндіріп алу тәжірибесіне және азаматтардың құқықтарын қорғауға қатысты ең өзекті мәселелер бойынша кәсіби әрі мазмұнды диалог өткізу болды.
Эфир барысында Мұрат Әбенов микроқаржы ұйымдары мен коллекторлық компаниялардың талаптары бойынша атқарушылық жазбаларды жасау тетіктерін қосымша жетілдіру қажеттігін атап өтіп, азаматтардың құқықтарын қорғау кепілдіктерін күшейтудің маңыздылығына тоқталды.
Депутаттың сұрақтарына жауап берген Республикалық нотариаттық палата төрағасы Олег Полумордвинов нотариат қоғамдастығы қолданыстағы проблемаларды талқылауға ашық екенін және заңнаманы жетілдіру бағытында мемлекетпен, Парламентпен және кәсіби қоғамдастықпен бірлескен жұмысты қолдайтынын айтты.
Талқылау барысында атқарушылық жазба институты мемлекет тарапынан сот жүйесіне түсетін жүктемені азайту және азаматтық айналымды жеделдету мақсатында даусыз талаптар бойынша өндіріп алу тетігі ретінде енгізілгені атап өтілді.
Сонымен қатар РНП төрағасы нотариат қоғамдастығы микроқаржы ұйымдары мен коллекторлық компаниялар саласындағы берешектерді өндіріп алу тәжірибесіне қатысты қоғамдағы сұраныстар мен проблемаларға мұқият қарайтынын жеткізді.
Сондай-ақ Парламент пен мемлекет жекелеген талаптарды тек сот тәртібімен қарау қажет деген шешімге келген жағдайда, нотариат қоғамдастығы мұндай тәсілді қолдауға дайын екенін айтты.
Эфир барысында заңнаманы одан әрі жетілдіру қажеттілігі, азаматтардың құқықтарын қорғау тетіктерін нақтылау, нотариустардың тәртіптік жауапкершілігі мәселелері, электрондық цифрлық қолтаңбаны пайдалану тәртібі, дербес деректерді қорғау, цифрлық нотариаттық әрекеттерді дамыту мәселелер де талқыланды.
Олег Полумордвинов нотариат қоғамдастығы үшін нотариатқа азаматтардың сенімін құқықтық тұрақтылық пен превентивтік әділет институты ретінде сақтау аса маңызды екенін атап өтті.
Сонымен қатар жекелеген нотариустар тарапынан заң бұзушылықтар анықталған жағдайда, Республикалық нотариаттық палата заңда көзделген жауапкершілік шараларын қолдануды және ішкі бақылау тетіктерін жетілдіруді қолдайтыны айтылды.
Өз кезегінде депутат Мұрат Әбенов нотариат институтына қоғам сенімінің жоғары деңгейін сақтау және осы саладағы реттеу мен бақылау тетіктерін одан әрі күшейту қажеттігіне назар аударды.

Эфирдің толық бейнежазбасы сілтеме арқылы қолжетімді. https://www.facebook.com/reel/4419687611654326